IVO oon valtiolinen virasto joka kuuluu Sosiaaliteparttementhiin ja se saapii joka vuosi sääntelypreivin hallitukselta. IVO:n päätehtävä oon ette vastata valvonasta ja lupatarkastuksesta terhveys- ja saihraanhoijossa, sosiaalipalvelussa ja toiminassa lain mukhaan tuesta ja palveluksesta vissile toimintaestetyile.
Virastolla oon suunile 770 työntekiätä. Valvonan työtä tehhään kuuessa valvontaosastossa ympäri maata. Lupatarkastuksen ja analyysin osastot oon Stokholmissa, niinku viraston kolme ylheiskattavvaa osastoa.
Valvontaosastoja
Valvontaa piethään kuuessa valvontaosastossa jokka oon Uumajassa (pohjos), Stokholmissa (itä), Örebrossa (keski), Jönkööpinkissä (kaakkos), Jöötteporissa (lounas), ja Malmöössä (etelä). Kaikki osastot oon vastuuliset seuraavista:
- Valvonta terhveys- ja saihraanhoijon ja sosiaalipalvelun toiminoista.
- Valvonta lekitimeeratusta henkilökunnasta, matkhaan räknätty ilmotukset Terhveys- ja saihraanhoijon eesvastuulautakunthaan (HSAN) koskevan lekitimasuunin perruuttamista ja muuta oikeutta.
- Yksityisitten valittamisia potilasturvalain mukhaan.
Näitten lisäksi valvontaosastoila oon erikoiset vastuualuheet seuraavasti:
Osasto pohjonen
- Käsittely varotuksista IMI:stä (informasuunisysteemi EU:n sisäsestä markkinasta) koskevan tietotusta muista eurooppalaisista maista pätevyysrajotuksista terhveys- ja saihraanhoitohenkilökunnale.
- Kontrolli lekitimeeratusta terhveys- ja saihraanhoitohenkilökunnasta, KALP.
Osasto itä
- Asioita potilasjurnaalitten tuhoamisista.
- Valvonta toiminoista jokka hantteeraavat verta ja kutoksia ja yhtheenjärjestämistä virastoitten veri- ja kutostoiminoista.
- Viraston toiminan yhtheensovitus koskevan lääketeknisiä tuotheita ja aputeekkivalvontaa.
- Omistus- ja johtotarkastus SoL:in ja LSS:in mukhaan.
Osasto keski
- Asioitten siirto kunnitten välissä SoL:in mukhaan.
Osasto kaakkos
- Päätöksiä ja hyöytettyjä tuomioita joitako ei ole totheutettu.
Osasto lounas
- Lapsi- ja nuorisolinjan yhtheensovitus.
Osasto etelä
- Hantteerinki ilmotuksista lain mukhaan informasuuniturvasta yhtheiskuntatärkeile ja tikitaalile palveluile (NIS-sääntely).
Osasto lupatarkastuksesta
Osasto lupatarkastukselle, Stokholmissa, oon vastuulinen lupatarkastuksista yksityisile toiminoile sosiaalipalvelulain ja lain mukhaan tuele ja palvelulle vissile toimintaestetyile (LSS) ja vissile lupatarkastuksille terhveys- ja saihraanhoijossa.
Osasto analyysile
Osasto analyysile vastaa analyysistä ja metutikehityksestä, soveletusta taattapohjasesta analyysistä, statistiikan ja rekisterin hantteerauksesta ja tietotuspalveluksesta.
Virastoylheiskattavat osastot
Jeneraalitirehtöörilä ja niilä kolmela virastoylheiskattavilla osastoila oon kontturit Stokholmissa. Virastoylheiskattavat osastot oon jeneraalitirehtöörin staapi, osasto suunittelulle ja komynikasuunile ja osasto toimintatuele.
Jeneraalitirehtöörin staapi antaa jeneraalitirehtöörille tukea muun muassa mitä koskee työtä viraston johtokuntaryhmän ja virastojohtokunnan ympärimailmakontaktitten kansa. Sielä oon kansa sentraalisti siotettu oikeusosasto.
Osasto toimintatuele vastaa viraston rekistratyyristä, ekonomiista, IT:stä, HR:istä, hankkimisesta, turvasta ja sisäsestä palveluksesta.
Osasto suunittelulle ja komynikasuunile vastaa viraston prässipalveluksesta, webbikontturista, strateekisesta komynikasuunityöstä ja yhtheensovituksesta ja tuesta virastolle koskevan suunittelua ja valmistelua tarkotuksessa ette varmistaa ette viraston arvostelut ja päätöksenteot tehhään yhtenhäisesti, tehokhaasti ja strateekisesti.